Pranvera rikthen restauratorët e rinj në zonën muzeale të Gjirokastrës. Vlerat historike dhe arkitektonike të qytetit të gurtë po tërheqin gjithmonë e më tepër jo vetëm vëmendjen e specialistëve vendas të trashëgimisë kulturore, por edhe të restauratorëve nga vende të ndryshme të botës.

Së fundi rreth 30 të rinj nga vendet e Ballkanit Perëndimor, Kosovë, Shqipëri dhe Bosnjë-Hercegovina si edhe nga SHBA, u bënë pjesë e Kampit të 16-të Rajonal të Restaurimit.

Për dy javë rresht specialistët e rinj të trashëgimisë kulturore u përkujdesën për komplekset muzeale dhe banesat e gurta.

Sipas restauratores Anisa Lloja, përgjatë Kampit të Restaurimit, pjesëmarrësit ndoqën një program rigoroz që ndërthuri teorinë përmes leksioneve, dhe punës praktike nëpërmjet ndërhyrjeve restauruese në monument.

Ndërhyrjet restauruese nga specialistët e rinj të trashëgimisë kulturore po kryhen edhe në tavanin e banesës Fico dhe muret rrethuese të banesës Babameto pranë Pazarit karakteristik.