TIRANE - Ish-ministri i Punës dhe Çështjeve Sociale në qeverinë Berisha 2, Spiro Ksera është arrestuar nga policia mbrëmjen e së premtes nën akuzën e vjedhjes të 30 milionë lekë të reja duke shpërdoruar detyrën. Arrestimi i Kserës, që shënon edhe vënien në pranga për herë të parë të një ish-ministri në vendin tonë, është bërë në një lokal në fshatin Derviçan të Gjirokastrës, ku ai jeton. Ndaj tij Prokuroria e Tiranës kishte lëshuar urdhër arresti me akuzën se ka përfituar shuma të konsiderueshme parash përmes tenderëve fiktivë për organizimin e aktiviteteve social-kulturore për fëmijët në nevojë, romët dhe moshën e tretë, gjatë vitit 2013 pak para zgjedhjeve të qershorit kur të djathtët lëshuan pushtetin. Në cilësinë e kryetarit të Entit Prokurues, në bashkëpunim me ish-drejtorin e Kabinetit Kleves Bitro si dhe mbështjen e disa zyrtarëve të tjerë, Ksera ka vjedhur paratë e akorduara për aktivitetet e shtresave të ndryshme sociale. Në shumicën e rasteve, sipas Prokurorisë së kryeqytetit, këto aktivitete nuk janë realizuar, ose janë bërë me kosto shumë më të ulëta se sa vlera që është shënuar në dokumentet zyrtarë.

Ne pranga edhe tre ish-punonjes te Kseres, mes tyre dy gra
Bashkë me Kserën në pranga kanë rënë edhe tre ish-zyrtarë të ministrisë që ai ka drejtuar, mes tyre dy gra. Artevis Mene 27 vjeç, ish-punonjës në ministrinë e Kserës, u arrestua mbrëmjen e së premtes në fshatin Gorcanci ku ai jeton, pranë Derviçanit. E arrestuar është edhe 31-vjeçarja Elda Kozaj nga Fieri dhe banim në Tiranë ish-punonjëse në ministrinë e Punës. Ndërsa ekonomistja e shoqërisë "Shpresa", Pranvera Lile 58 vjeç nga Gjirokastra dhe banim në Tiranë, akuzohet për falsifikim të dokumenteve.

Sipas Policisë janë lëshuar edhe 3 urdhër arreste të tjera, për personat Alban Karabashi si dhe personat me inicialet A.J, D.F, të cilët Prokuroria e Tiranës i akuzon për shpërdorim detyre.

Urdhër ndalimi ka edhe për ish- shefin e kabinetit të Kserës, Kleves Bitron, i cili aktualisht ndodhet në burg, ku vuan një dënim tjetër për shpërdorim detyre.

Avokati i Kserës, Genc Gjokutaj gjatë një komunikimi jashtë kamerave, pohoi se arrestimi ishte i paligjshëm dhe se klienti i tij që nga nisja e hetimit nuk ishte pyetur asnjëherë.