http://www.vizionplus.tv
https://facebook.com/VizionPlusTV
https://twitter.com/VizionPlusTV
Akademia e Arteve rikthehet në qendër të vëmendjes. Në auditorët dhe bankat e një universiteti ku përgatiten artistët e së ardhmes, tashmë flitet vetëm për koncertin e së dielës mbrëma. Vlashent Sata, një kantautor tashmë i njohur edhe përtej kufijve të Shqipërisë, rikthehet në Tiranë për të përcjellë një koncert bamirësie. Biletat, të ardhurat nga të cilat do të shkojnë për fëmijët jetimë kanë filluar tashmë të shiten në sportelin e Teatrit Kombëtar. Ndërsa vetë Teatri Kombëtar sjell këtë fundjavë një shfaqje të re, me aktorët më të mirë të skenës teatrale. Yllka Mujo, Neritan Liçaj dhe Karafil Shena vijnë në dramën ?Gruaja në dritare?, të shtunën dhe të dielën në ora 19.00. Ndërkohë që Teatri Eksperimental dhe ai i Metropolit vendosën që edhe këtë fundjavë të risjellin veprën ?Arturo Ui?. Dasma e Figaros duket se shënoi kulmin e kësaj jave në Teatrin e Operas dhe Baletit. Të rinjtë më të mirë nga Akademia e Arteve kanë arritur të fitojnë duartrokitjet, ndërsa një e re shumë e talentuar po përgatitet që këtë fundjavë të ngjitet në skenë. Mirela Lico do të përcjellë me violinë Moxartin duke filluar që nga kjo fundjavë, por edhe mbrëmjen e së hënës në ora 20.00 Fundjava vjen me risi edhe për artin vizual. Përtej bienales së pikturës në letër apo Giovanni Bonardit në Muzeun Historik kombëtar, vjen një ekspozitë fotografish. Pedagogu Julian Bejko, në bashkëpunim me Arkivin Qendror Shtetëror të Filmit dhe Qendrën Kulturore ?Tulla? sjellin ekspozitën me fotografi nën titullin ?Tre akte në aksion?. Ekspozita do të paraqesë fotografi nga skenat më të njohura të filmave të Kinostudios ?Shqipëria e re?. Kjo është një javë e mirë edhe për të vegjlit. Pas shfaqjeve ?Surprizat e pranverës në Cirkun Kombëtar? dhe ?Dy çamarrokët? në Teatrin e Metropolit, që rivihen në skenë edhe këtë fundjavë, më në fund fëmijët, do të shohin një shfaqje të re në Teatrin e Kukullave. Shfaqja Guliver, vjen si premierë e parë e këtij teatri pasditen e së premtes, ndërkohë që të vegjlit do të kenë mundësi ta ndjekin shfaqjen edhe gjatë fundjavës në ora 10.30 dhe 11.30.