TIRANË - Ish-të përndjekurit politikë femra dhe ata që vuajnë nga sëmundje të rënda do të jenë të parët që do marrin lekët e dëmshpërblimit për vitet e burgut. Zv/ministrja e Mirëqenies Sociale, Gentiana Sulaj, ka shpjeguar ndryshimet që i janë bërë ligjit për dëmshpërblimet dhe kategoritë prioritare te ish-të përndjekurve që do të përfitojnë të parët.

Aktualisht 2700 ish të dënuar politikë janë gjallë, dhe për të likujduar tetë këstet që u takojnë, duhen në total 85 milionë dollarë.

Grupi i punës i ngritur në ministrinë e Mirëqenis Sociale, do të nisë shumë shpejt shqyrtimin edhe të mbi 2000 dosjeve të ish të përndjekurve politikë, që kanë ngelur jashtë kësaj skeme për shkak të mangësisë në dokumentacion. Sipas përllogaritjeve paraprake do të duhen 400 mln dollarë për të dëmshpërblyer të gjithë të dënuarit politikë për vitet e burgut gjatë monizmit.