TIRANË - Pesë ekspertë italianë të cilët kanë hetuar në shtetin fqinj pasojat e tërmetit shkatërrues që ra në L'Aquila po asistojnë hetuesit në prokurorinë e Durrësit për të gjetur fajtorët pas dëmeve të tërmetit tragjik të 26 nëntorit në Shqipëri që la dhjetra viktimë, qindra të plagosur e mijëra të pastrehë. 5 ekspertët italianë, mes të cilëve 2 prokurorë, një inxhinier dhe 2 oficerë të policsë gjyqësore, patën një takim në Prokurorinë e Përgjithshme me kryeprokurorin Olsian Çela, ndërsa nesër do të zhvendosen në Durrës ku do të njihen me dosjet e hapura në prokurorinë e këtij qyteti për pasojat e tërmetit.