REPORT TV siguron pamjet ekskluzive e autobusit me 15 nxënës që u përmbys në Skrapar mëngjesin e sotëm. Autobusi ka rënë nga rreth 20 metra lartësi në greminë, por fatmirësisht të gjithë nxënësit dhe shoferi kanë shpëtuar.

Nga të dhënat e para sipas gazetarit të Report Tv në Berat, autobusi ka qenë me shpejtësi dhe në momentin që shoferi ka tentuar të frenojë në kthesë në një terren shumë të vështirë, ka përfunduar në greminë.
Autobusi pas disa rrotullimeve ka përfunduar në humnerë, por pavarësisht se aksidenti ishte i rëndë, shoferi nuk ka pësuar dëmtime, madje ka qenë ai që ka lajmëruar policinë, ambulancën dhe zjarrfikësen, që u kanë ardhur në ndihmë nxënësve duke i dërguar në spital.

Autobusi që u aksidentua sikur duket edhe nga pamjet e Report Tv është shumë i vjetër dhe amortizuar. Nga 15 nxënësit që ndodheshin në autobus, një është dërguar në Tiranë për mjekim të specializuar, 4 ndodhet në spitalin e Skraparit dhe 5 të tjerë në spitalin e Beratit jashtë rrezikut.