Për herë të parë Ministri i Mbrojtjes Talat Xhaferri konferencën për media e mbajti vetëm në gjuhën shqipe. Për dallim nga herët tjera kur konferencat për media i mbante në dy gjuhë, sot Xhaferi foli vetëm shqip. Me këtë Xhaferi theu akullin dhe u bë ministri i parë që konferencën për media e mban vetëm në gjuhën shqipe. Ministria e Mbrojtjes sot hapi konkursin e tretë për trajnimin e pilotëve të rinj të cilët do të trajnohen në Qendrën për Trajnim të Pilotëve. Xhaferi me këtë rast tha se konkursi është i hapur për të gjithë të rinjtë që kanë kryer fakultetin, pavarësisht drejtimit.

"Ky është cikli i tretë i trajnimit të kandidatëve për pilotë për nevoja të Ministrisë së Mbrojtjes, deri më tani në dy ciklet parapake janë stërvitur 7 kandidatë dhe zakonisht çdo cikël stërvitës është i përcaktuar që të ketë maksimum 4 kandidatë.Trajnimi zgjatë 18 muaj, përzgjidhen kandidatë të cilët kanë mbaruar fakultet civile nëpër universitetet përkatëse të Maqedonisë dhe pas mbarimit të trajnimit ata kandidatë që mbarojnë trajnimin me sukses, përurohen me gradë të oficerit, në gradën toger", tha Talat Xhaferi, Ministër i Mbrojtjes.

Xhaferi u bëri thirrje sot të rinjve shqiptarë që të konkurrojnë pasi në këtë konkurs përzgjidhen më të mirët, pa dallim përkatësisë etnike. Drejtori i Qendrës për trajnim të pilotëve 'Elbit', Jaari Shraga tha se ky konkurs është mundësi e mirë për të rinjtë me fakultet të përfunduar pasi pas përvojës së përfituar, këta të rinj marrin gradën toger.

"Këtu në Maqedoni ka mijëra të rinj të papunësuar që veç më kanë përfunduar studimet universitare d.m.th në pajtim me kriteret që ekzistojnë për tu bërë pilot ushtarak, unë dua të shfrytëzojë këtë rast dhe juve si media që ti thërras të gjithë të rinjët që kanë talent, le të konkurrojnë pa dallim se prej nga vijnë dhe çfarë fakulteti kanë kryer pasi ne kalojmë kandidatët në një proces profesional dhe të njëjtët kështu dhe do të trajnohen", u shpreh Jaari Shraga, drejtor i Qendrës për trajnim të pilotëve.

Njëri nga kandidatët e konkursit të parë tha se në Qendrën për Trajnim të pilotëve nuk merret parasysh përkatësia etnike apo fetare, por cilësia dhe aftësitë e kandidatit.

"Sa i përket numrit të njerëzve të paraqitur dhe shumëllojshmërisë së kombësisë së kandidatëve, para së gjithash do të thosha se nevojitet kuantitet që të zgjidhet cilësia, derisa ka numër të madh të të paraqiturve në konkurs, normal do të përzgjidhen më të mirët", theksoi Dejan Sllavevski, kandidatë.

Deri tani janë realizuar dy konkurse nga ku janë përzgjedhur 7 kandidatë. Trajnimi i tyre zgjatë 19 muaj, kurse pilotët e parë pritet të avancohen me grada oficer në fillim të vitit 2014. Valmir Kuçi