Në njësitin elitar ushtarak 'UJQIT' nuk ka asnjë shqiptar, këtë e ka konfirmuar më në fund edhe vetë Ministri i Mbrojtjes Talat Xhaferi. Ai sot edhe zyrtarisht u prononcua për Televizionin ALSAT-M duke sqaruar se pjesëmarrja e ushtarëve në këtë njësit qenka në mënyrë vullnetare, dhe stereotipi i krijuar nga historiku i hidhur i këtij njësiti që është themeluar në vitin 2001 gjatë konfliktit ushtarak në vend, sipas tij i bën shqiptarët të mos tregojnë vullnet për pjesëmarrje në të.

"Gjendja faktike për momentin është që në njësitin, gjegjësisht në batalionin e 'UJQËVE' nuk është transferuar asnjë prej shqiptarëve për faktin që në çdo vit trajnim, për trajnim selektues, edhe pse paraqitet një numër i konsiderueshëm i tyre, nuk qëndrojnë deri në fund edhe atë për aspekt vullnetarë tërhiqen. Fakti i perceptimit se ata njësite janë të paprekshme për shqiptarët është perceptim i bërë me kohë dhe për vite dhe këtë perceptim të gjithë bashkërisht duhet të punojmë që ta ndryshojmë tek të rinjtë tanë", deklaroi Talat Xhaferi, Ministër i Mbrojtjes.

Ndërkohë Xhaferi pa shifra konkrete sa i përket përqindjes së shqiptarëve në departamentin për zbulim, kundërzbulim dhe mbrojtje. Ai thotë se në këtë departament numri i shqiptarëve është i kënaqshëm.

"Gjithsej d.m.th janë të punësuar 5 oficer, nënoficer 2 dhe me shkollë të mesme 2 që nënkupton se janë 9 ose me përqindje oficer 15 për qind, nënoficer 22 për qind dhe me shkollim të mesëm 20 për qind", tha Talat Xhaferi, Ministër i Mbrojtjes.

Xhaferi nuk konfirmon e as nuk mohon lajmin se vetëm para disa javëve po në departamentin e zbulimit dhe kundërzbulimit të mbrojtjes janë avancuar 13 epror ushtarak nga ana e tij, nga të cilët asnjë shqiptarë. Në këtë departament punojnë vetëm 5 shqiptarë, me të cilët nuk plotësohet dispozita kushtetuese që garanton për shqiptarët 25% të vendeve në institucionet shtetërore. Ndryshe siç kemi njoftuar edhe më herët si në njësitin elitar ushtarak "UJQIT" edhe në atë policor "Tigrat" nuk ka as një shqiptarë. Valmir Kuçi