قبل ما نكمل آخر أخبار بلدنا، عايزة اقول لكم بس ان وعد الحر دين عليه وزي ما وعدناكم ان الدكتورة منال عمر، استشاري الطب النفسي وواحدة من أعضاء "المبادرة المجتمعية لاحتواء اضطراب كرب ما بعد الصدمة"، الشهيرة بمبادرة "انت مش لوحدك"، هتكون معانا في فقرة اسبوعية ثابتة في بلدنا بالمصري كل يوم حد، ابتداءاً من يوم الحد اللي جاي.. والهدف من الفقرة اننا وبوسائل مختلفة نحط "كربنا على كرب بعض" في محاولة لتهوين المواجع والشفا منها لو أمكن.. وبالتالي هنسميها على اسم المبادرة نفسها "انت مش لوحدك".. وما اخبيش عليكوا انه من ساعة ما كانت الدكتورة منال عمر معانا المرة اللي فاتت واتكلمت عن أعراض كرب ما بعد الصدمة، وأنا حاسة اني أنا شخصياً عندي شوية أعراض منهم، وخايفة يكون دة طالع عليكوا بشكل أو بآخر واحنا مش داريانين.. وبالتالي، يوم الحد اللي جاي أنا هابدأ بنفسي مع الدكتورة منال في جلسة علنية على الهواء مباشرة وربنا يجيب العواقب سليمة

وحضراتكوا تقدروا تتواصلوا معانا ومع الدكتورة منال من خلال صفحة "بلدنا بالمصري" على فيس بوك: هنستقبل اسئلتكم واقتراحاتكم وكل اللي شاغل بالكم ومش بس كدة، اللي منكم كمان حابب أو مستعد يفضفض بكربه مع الدكتور منال على الهوا ومن خلال بلدنا بالمصري، يا أهلاً وسهلاً بيه وخطوة عزيزة..