मुंबई ते नवी मुंबई प्रवास आजपासून वॉटर टॅक्सीतून करता येणार आहे. देशातल्या पहिल्या वॉटर टॅक्सीचं उद्घाटन गुरुवारी करण्यात आलं. मुंबई ते बेलापूर दरम्यानची ही जलवाहतूक गेले काही महिने उद्घाटनाच्या प्रतीक्षेत होती. अखेर आज केंद्रीय मंत्री सर्वानंद सोनोवाल यांच्या हस्ते या सेवेचं उद्गाटन करण्यात आलं. या कार्यक्रमाला राज्याचे मुख्यमंत्री उद्धव ठाकरे हे ऑनलाईन उपस्थित होते. या प्रकल्पासाठी 8.37 कोटी खर्च करुन प्रवासी जेट्टीचं बांधकाम करण्यात आलं आहे. केंद्र आणि राज्य शासनामार्फत 50 : 50 प्रमाणात निधी उपलब्ध करुन देण्यात आला आहे. मुंबई ते नेरुळ, बेलापूर, जेएनपीटी, एलिफंटा या मार्गे वॉटर टॅक्सी सेवेचे लोकार्पण करण्यात आलं. बेलापूर येथून प्रत्येकी 10 ते 30 प्रवासी क्षमता असलेल्या 7 स्पीडबोटी असतील. 56 प्रवासी क्षमता असलेली एक कॅटामरान बोट अशा एकूण 8 बोटींद्वारे वॉटर टॅक्सी सेवा सुरु केली आहे. बेलापूर ते दक्षिण मुंबईत भाऊचा धक्का पर्यंत स्पीड बोटीने फक्त 30 मिनिटं लागतील. तर कॅटामरान बोटीला 45 ते 50 मिनिटांचा कालावधी लागणार आहे. स्पीडबोटीचं भाडं प्रति प्रवासी 800 ते 1200 रुपये असणार आहे. तर कॅटामरान बोटीकरीता प्रति प्रवासी 290 रुपये इतकं ठेवण्यात आले आहे. बेलापूर येथून भाऊच्या धक्क्याबरोबरच एलिफंटा, जेएनपीटी या जलमार्गावर सुद्धा प्रवासी सेवा चालविण्यात येणार आहे.