Kryedemokrati Lulzim Basha ka rezervuar një dalje publike të posaçme për vendimin e tërheqjes së vëzhguesve për zgjedhjet e 30 qershorit. Edhe pse bëhet fjalë për Kongresin e autoriteteve vendore për promovimin e demokracisë dhe të drejtave të njeriu dhe jo për organin që ka lidhje të drejtpërdrejtë me BE, për Bashën ky është një tregues që 30 qershori nuk njihet nga ndërkombëtarët si ditë zgjedhjesh. Ai ka ripërsëritur se nuk do të ketë zgjedhje këtë fundjavë, pasi 30 qershori nuk është kushtetues si datë, ndonëse Kolegji Zgjedhor e ka legjitimuar atë.

"Sot bota perëndimore dha sinjalin e parë, të qartë dhe të prerë, se 30 Qershori nuk është ditë zgjedhjesh në Shqipëri. Vendimi i Kongresit të Autoriteteve Rajonale e Lokale të Këshillit të Europës për të anulluar dërgimin e Delegacionit Vëzhgues për farsën elektorale që po tenton të zhvillojë Edi Rama, është fakt kuptimplotë se në 30 Qershor nuk ka zgjedhje në Shqipëri.

Për herë të parë nga rënia e komunizmit, Këshilli i Europës ka vendosur të mos dërgojë Delegacion Vëzhgues për zgjedhjet, pavarësisht ftesës që i ka bërë Qeveria shqiptare. Këtë vendim Këshilli i Europës e ka marrë jo sepse ia ka kërkuar opozita, por sepse 30 Qershori nuk është ligjërisht ditë zgjedhjesh në Shqipëri. Ky është një vendim qartësisht politik sepse është një tërheqje që Këshilli i Europës nuk e ka bërë as për zgjedhje të zhvilluara në zona konfliktesh të armatosura apo konflikti civil nga Ukraina në Gjeorgji nga Armenia dhe Azerbajxhani apo edhe gjatë konfliktit të armatosur në Maqedoni. Duhet të mbahet parasysh se Këshilli i Europës është institucioni kryesor i monitorimit të zgjedhjeve vendore në Europë. Tërheqja e Këshillit të Europës, institucionit kryesor europian të mbrojtjes së të drejtave të njeriut dhe demokracisë, është distancim i qartë nga votimet farsë një-partiake, anti-demokratike dhe anti-kushtetuese që kërkon të bëjë Edi Rama", tha Basha.