TIRANE-Kryeministri Edi Rama mori përsipër mesditën e sotme të shpjegojë para opinionit publik me anë të një bashkëbisedimi me gazetarët prapaskenat e takimit të djeshëm Rama-Basha te Presidenti Bujar Nishani.

Kreu i qeverisë duke krahasuar politikën me lojen e shahut, shpjegoi se përse dje u paraqit tek Basha me propozime të reja, ndryshe nga ato të paketës të gjermanit, Mc Allister, që u diskutuan me opozitën në një tryezë 1 javë më parë.

Rama zbardhi sot postet në qeveri që i ka lëshuar Bashës, me qëllim që opozita të monitorojë deri në detaj procesin zgjedhor për të cilin shprehet mosbesues.

Një zv/kryeministër, një ministër shteti për Teknologjinë, një zv/ministër Arsimi, një zv/ministër për Punët e Brendshme, një zv/ministër për Drejtësinë, si dhe një zv/Drejtor i Policisë së Shtetit, janë postet për të cilat Rama shprehet se është gati të pranojë në moment emrat që do i propozojë Basha.