كلمات شريف المنباوي
****
يا أم العيون المصراوية
يا أم العيون المِشعلية
متكحلين بالبسمتين
ومنورين بالضحكتين
ومسبلين الرمش الأسمر
ع الخدود القمحاوية

ياحلوة رمشك ع الخدود
بُرقع ورود
ملهوش حدود
وكأنه فِ بيوت الغورية
و ده اللي فوق المشربية
يا أم العيون المصراوية

أنا قلبي لابس جلابية
وصديري شغل اسكندرية
لافف ع دراعهُ الشبك
جانى الغورية وانشبك
مجدع بيرقص بالعصا
والفُل راسمه فِ الطاقية
يا أم العيون المصراوية