كلمات الشاعر محمد جاد الرب
......
يا أم المطاهر رشى الملح سبع مرات
ومع الزغروطة
احكى حدوتة تعلب فات
اقال المطاهر شافها مظاهر
طب سكات
وبايديه شرخ
بنيان وصرخ
وكتب وترخ
ما احناش بقرات
يا ام المطاهر رشي الملح 7 مرات

يا أم المطاهر رشى الملح وخبى عنيه
اتولد الحر ف ساعة ضهر وياختى عليه
لا يطيع ولا يسمع
ولا بيصدق كدب وليه
بيبص لأبوه
ويقول هوووه
ماله مغمى عليه
وهتنطق امتى يا بابا
وتقول ان احنا فى غابة
وشريعة الغاب موات
يا ام المطاهر رشي الملح 7 مرات

و مع الزغروطه احكى حدوته تعلب تيه
قام سهى الكلب و كتف ايده و كمان رجليه
و دخلى فى سينا و فين مراسينا و ابصر ايه
فاتت سنه و اكتر قال فين عنتر ؟
بيقول إيه ؟
المولود راخر لازم يسكت
طب على إيه ؟
قال فيه عصيان و جابوا العصيان
تضرب صبيان و قنابل تملى بلدنا دخان
ما كفاهش غارات ما كفاهش صوات
يا ام المطاهر رشي الملح 7 مرات

أصل الحدوتة يا خالة ستوتة
الواد جاى لأمه
اتشحطر ياختي
ومين بقى يقدر يوم ويلمه
وأبوه قال ياختى جاى
وعمه كان هيضمه
قال ابعدوا عنى
سيبونى اغنى
اقول يا مغنى موالك مات
وان كدب المغنى يكون المعنى
التعلب فات
وان فات التعلب يبقى فى ديله سبع لفات
فى اللفة الواحدة
يا أمة موحده
دول ربطولنا عشر نكسات
يا ام المطاهر رشي الملح 7 مرات