TIRANE -- Autori i dyshuar i dhjetërave vjedhjeve me dhunë në Tiranë, është vënë sot në pranga nga forcat e komisariatit numër 3 të kryeqytetit. Emilent Dhepa, u arrestua në sajë të operacionit "BUTIKU", operacion i cili u kodua me këtë emër për shkak se 35-vjeçari grabiste nën kërcënimin e armës dyqane rrobash.

Dhepa, i cili ishte shpallur në kërkim prej muajit shkurt, për grabitjen e dy butikëve, vjedhje të cilat i realizoi brenda një nate, është arrestuar në Kombinat.

35-vjecari është liruar nga burgu 8 muaj më parë i dënuar sërish për vjedhje me dhunë. Policia, në sajë të një hetimi disamujor në ngarkim të tij, ka dokumentuar përfshirjen e Emilent Dhepës në 10 vjedhje me dhunë në vende të ndryshme të qarkut të Tiranës.

Aktualisht nga strukturat e policisë po punohet për të dokumentuar të tjera vjedhje me dhunë të kryera nga ky shtetas, ndërkohë që materialet ju kaluan Prokurorisë së Rrethit Gjyqësor Tiranë.