طبعاً مش محتاجين نقول إن إحنا مش أول بلد في التاريخ تعمل دستور. يعني احنا مش بنخترع الذره. وبالتالي عشان أي بلد تكتب دستور جديد وتطرحه لاستفتاء شعبي يقرر شكل البلد لاجل غير مسمى .. طبعاً لأن الأصل في كتابة أي دستور .. إنه يبقى مستمر على طول .. مش إنه يتغير كل كام سنة .. ولا إنه يتعمل وبعدين نبقى نظبط المواد المختلف عليها فيه بعدين. وعشان كدة كان كل الناس بتقول إن الاغلبية السياسية في البرلمان مثلا .. مش المفروض يكون ليها أي تأثير على الجمعية التأسيسية اللي المفروض بتمثل كل طوائف الشعب .. والأقلية قبل الأغلبية.
المهم اللي حصل حصل .. والدستور إتكتب .. و10 محافظات نزل ابنائها للإدلاء بأصواتهم يوم السبت اللي فات .. والباقي المفروض هيقولوا كلمتهم يوم السبت اللي جاي. وفي وسط كل ده ظهرت مشاكل اجرائية لا حصر لها .. أو عشان احنا مش جهة إختصاص .. خلونا نقول تساؤلات وإعتراضات وبلاغات ومحاضر وقضايا. هنتكلم عنهم مع ضيفنا الأستاذ محمود بلال المحامي الحقوقي .. ونعرف منه المفترض ايه تأثير كل ده على الإستفتاء والدستور.