السلام والتحية على حضراتكو واهلا بيكو معانا ... مابين قرار إغلاق المحالات التجارية في العاشرة مساء وبدء توزيع اسطوانات البوتاجاز ببطاقات التموين وقررات أخرى للحكومة هنعرضها على حضراتكو في أخبارنا النهاردة بيقف المصرين في حالة ارتباك وقلق ... وإحنا هنا مش بنهاجم القرارات الجديدة دي ولا بنقول أنها غلط بنسبة 100 % احنا بنقول ان حالة التوتر والقلق دي نتيجة سرعة القرارات اللي بتتخذها الحكومة من غير ما تمهد ليها ومن الواضح انها ايضا من غير دراسة جدية حولين تطبيق هذه القرارات .. والدليل ان الحكومة ابتدت تجيب لورا وتتراجع في كلامها فيما يتعلق باغلاق المحلات وبعد ما كان تم إقرار يوم السبت لبدء تنفيذ القرار لكنها تراجعت وقالت ان القرار حيتنفذ لم تصدر اللايحة التنفيذية بتاعته .. اعتراضات شديدة على قرار إغلاق المحلات التجارية واعلان البعض عن تنظيم مسيرات ضد القرار.. يا ترى مقهى البورصة وهو من المناطق اللي كانت حتتأثر بقوة من قرار الإغلاق شايفة الموضوع ازاي ده اللي حنعرفه من زميلنا أمير حسام المتواجد في منطقة وسط البلد