السلام والتحية على حضراتكو أهلا بيكو معانا .. مش عارفين التسريبات اللي بتطلع دلوقتي كويسة ولا وحشة بخصوص نقل تبعية «الأمن الوطنى» للرياسة بدلا من الداخلية كان فيه كلام طلع من فترة عن الكلام ده ابتدى يطرح نفسه بقوة، وعلى ما يبدو ان فيها حاجة بخصوص الأمن الوطني خلال اليومين اللي جايين دولا .. بالتأكيد فيه تساؤلات كتير مشروعة من حقنا نسألها لأن تجربة المصريين مع أمن الدولة خلال 30 سنة كانت سيئة جدا .. وكتير من الناس كانوا بيتراقبوا لمجرد ان ليهم أراء سياسية مختلفة واتحول أمن الدولة لأمن النظام وكان عدو الشعب الاول بدل ما يحميه وكتير من الناس ليهم قصص وحكاوي عن أمن الدولة، وبعد الثورة تم تغيير اسم امن لدولة في حكومة الدكتور شرف وبقى الأمن الوطني .. ودلوقتي الكلام عن نقله للرياسة .. فهل هو حيكون هدفه أمن الرياسة .. وهل ممكن يتحول لذراع باطشة للسياسيين من المعارضين الرئيس مرسي .. ونضمن منين انه ما يتمش استخدامه لصالح حزب الحرية والعدالة زي ما كان الحزب الوطني بيستخدم أمن الدولة.