تحياتنا وتعازينا ويعز علينا انه ما يبقاش هاين علينا نمسي عليكوا أو حتى نتمنى من ربنا يسعد مساكم لاننا عارفين انه طلب عزيز الليلة ديه.. لكن نتمنى من ربنا يقوينا ويثبتنا ويهون علينا ويصبرنا ويآمن خوفنا ويقدرنا على اللي احنا فيه وعلى كل اللي فات ويجعل المخبي لطيف ويعوضنا خير عن كل اللي دفعناه واللي لسة بندفعه ويقينا بالله انه ابداً مش هيروح هدر لإنه كبير ولإنه الحق ولإنه العدل ولإنه المنتقم الجبار ولإنه النور ولإنه محبة.. ولإنه وعدنا لو "دعيناه في الضيق هيجيبنا من الرحب" وإن "مع العسر يسرا"، مهما ضاقت ومهما تقلت علينا المواجع.

زي النهاردة، السنة اللي فاتت وزي دلوقتي بالدقيقة كنا برده لابسين اسود في اسود وبندعي ربنا يعديها على خير ويجيب العواقب سليمة ويجعلها آخر الأحزان.. ومن ساعتها ولحد النهاردة والحزن متبت فينا ومش هاين عليه يفارقنا وكل ما نيجي نفرح يستكتر علينا الفرحة بفعل فاعل ومع سبق الاصرار