من ضمن آخر أخبار بلدنا، إن وزارة الداخلية أصدرت بيان امبارح نفت فيه كل ما ورد في الفيديو اللي انتشر على عدد من المواقع الالكترونية لمجند اسمه إبراهيم حسن محمود عمره 22 سنة، قال خلاله إنه مجند في تشكيل من تشكيلات الأمن المركزي اللي كانت مكلفة بالدفاع عن وزارة الداخلية في أحداث محمد محمود وإنه رمى سلاحه بعد ما شاف الناس بتموت وإنه خد ضربة على راسه أفقدته الوعي ولما فاق اكتشف إن المتظاهرين نقلوه للمستشفى الميداني ومن ساعتها وهو في حمايتهم.. وحسب المركز الإعلامي في وزارة الداخلية، إنه بفحص مجندين قطاع الأمن المركزي، اللي بيحملوا نفس الاسم ونفس البيانات اللي وردت على لسانه في الفيديو تبين إنها مش منطبقة على المجندين المشتركين في اسم إبراهيم حسن محمود وعددهم 5 جنود على مستوى قطاع الأمن المركزي ووزارة الداخلية، مع صورة الشخص الواردة في الفيديو... احنا كنا أشرنا للواقعة ديه وذعنا الفيديو نقلاً عن موقع جريدة البديل، لكن بعد بيان وزارة الداخلية اللي صدر امبارح بالليل كان واجب علينا نتأكد بنفسنا من شخصية المجند ومن صحة الواقعة وربما نكون وصلنا لنتيجة هنعرضها على حضراتكوا بالصوت والصورة في نهاية الحلقة.