أخيراً وبعد أكتر من سنة ونص من عمر الثورة، اقتنعت القوى والأحزاب المدنية إنها لازم تتوحد، زى مابيقولوا كده الاتحاد قوة.. شفنا الأحزاب الأحزاب اليسارية والاشتراكية والمهتمين بفكرة العدالة الاجتماعية بيحاولوا يتجمعوا فى التيار الثالث.. وشوفنا حزب الوفد والأحزاب الليبرالية بيحاولوا يتفقوا على تحالف انتخابي للتيار الليبرالي.. كده بئه عندنا تحالفين مدنيين فى الانتخابات التشريعية الجاية.. يارب ينجحوا المرة دى ونشوف كتلتين أقويا للتيارات المدنية.. لكن الجديد بئه واللى ماحدش حاول يعمله قبل كده أن رؤساء أحزاب وقيادات سياسية كبيرة بحجم أيمن نور وأسامة الغزالي حرب وعمرو وموسي والسعيد كامل ورؤساء أحزاب كتير يقرروا يتنازلوا عن مواقعهم ويندمجوا فى حزب واحد، لغاية دلوقتي حزبين بس اللى أعلنوا موافقتهم هم غد الثورة والجبهة الديمقراطية ..مين الأحزاب التانية اللى ممكن تدخل وإيه شروط الاندماج،ومين هيبقى رئيسه ويدير الحزب، وهل رؤساء الأحزاب هيوافقوا يكونوا مجرد أعضاء ؟ تساؤلات كتير ومحيرة .. ده اللى هنعرفه إنهارده من ضيفنا انهارده الأستاذ السعيد كامل رئيس حزب الجبهة.. أهلاً وسهلاً بيك يا فندم.