يسعد مساكم وحلقة جديدة من بلدنا بالمصري، هنبدأها بمتابعة سريعة للقضية اللي عرضناها في حلقة امبارح والمتهمة فيها مي متولي الطالبة في كلية الإعلام جامعة القاهرة، التعليم مفتوح.. مي متهمة بالاعتداء على ظابط شرطة يوم 24 مايو اللي فات، بالليل في شارع جامعة الدول العربية في لجنة مرور قدام جامع مصطفى محمود.. مي كانت بتتحاكم النهاردة قدام القضاء العسكري_دة ناهينا عن إنها بتنفي تماماً إنها تكون اعتدت على المقدم عمرو أبو اليزيد بالضرب أو بالسب_ومش كدة وبس ديه بتتهمه كمان بالاعتداء عليها بالضرب وسبها ومحاولة تصويرها واحتجازها ليلتين في قسم الدقي بدون وجه حق _دة حسب كلامها في الفيديو المصور والمنشور على بوابة الوفد، وحسب كلام والدتها اللي كانت معانا امبارح على الهوا وحسب محامي الدفاع عنها الأستاذ/ عاصم قنديل في مداخلته معانا امبارح في نفس الفقرة