في مصر حاجات كتير بيتقال عليها مجنونة ، زي الطماطم ، اللي يوم في النازل و باقي الاسبوع في الطالع ، و الدهب اللي كان ليه مواسم يطلع فيها و باقي السنة ثابت او في النازل ، لكن من سنتين و الدهب بقي كل يوم في الطالع مش بينزل ، و الناس بدأت تسأل ليه الدهب طالع، الرد الجاهز اصله مرتبط بالبورصة العالمية !! و يجي حد كده فيقول ازاي و احنا عندنا منجم دهب مصنف ضمن اكبر 20 منجم على مستوى العالم و هو منجم السكري ،
لحد هنا و تلاقي الكلام وقف...و بتخرج حكايات تانية كتير زي : هو بيروح فين دهب السكري ؟ و يا تري مصر بتستفيد منه و لا ايه الحدوتة ؟ و يا ترى الاخبار اللي اتقالت بعد الثورة من ان الدهب بيخرج من المنجم علي طيارات بتتهرب بره مصر لصالح الرئيس المخلوع و اعوانه ؟ و حكايات تانية كتيير ..هنحاول نعرف حقيقتها مع ضيفنا النهارده د. "أحمد عاطف دردير" ، الرئيس الأسبق لهيئة المساحة الجيولوجية وعضو مجلس علماء الثروة المعدنية سابقا.