طيب.. شاء من شاء وابى من ابى، خسر الفريق احمد شفيق وفاز الدكتور محمد مرسي برئاسة مصر المحروسة الى حين.. اما اهالي المحروسة فحالتهم حالة خاصة اذا حطينا في اعتبارنا واولنا الرئيس الفائز ان من اصل ال13 مليون و230 الف و131 صوت، بس 5مليون و764 ألف و952 صوت..هم اللي كان بالنسبة لهم الدكتور محمد مرسي هو الاختيار الاول وصوتوا له من اول جولة.. اما بقية الاصوات واللي عددهم اكبر في الحقيقة، فكل صوت فيهم وبالضرورة راح له مضطر او على عينه او من باب القضا اللي اخف من قضا واذا حطينا كمان في اعتبارنا واولنا برده الرئيس الفايز ان من اصل ال12 مليون 347 الف و380 صوت اللي راحو للمرشح الخاسر بس5 مليون و505 الف و327 صوتهم اللي كان بالنسبة لهم الفريق هو الاختيار الاول وصوتوله من اول جولة اما الباقي، وبرده عددهم اكبر فراح له مضطر او على عينه او من باب القضا اللي اخف من قضا وبالتالي يمكن ماكانوش معاه بقدر ما كانوا ضد المرشح اللي صبح رئيس.. وبالتالي ردود افعال اهالي المحروسة واحلامهم ومخاوفهم وهواجسهم وامانيهم، سواء بقة اللي صوت لدة او لدة او ما صوتش خالص او راح علم على الاتنين باللي فيه القسمة لازم نحطها جميعا حلقة في ودننا واولنا الرئيس الفايز ومن قبله ومن بعده المجلس العسكري اللي لم ولن يسلم السلطة كاملة للرئيس المنتخب ولحين ميسرة وعلينا خير.