لازم كلنا نكون متفقين وباصمين بالعشرة انه لا عاد عندنا وقت ولا براح لمجرد التنظير والكلام والشعارات اللي شبعنا منها على قلة فايدة، ولا عاد عندنا وقت ولا براح لتبادل الاتهامات اللي لا منها ولا كفاية شرها، وانه آن الأوان نخطي خطوات حقيقية وعملية في اتجاه الحلول، سواء الفورية أو على المدى البعيد. وإذا كانت المواطنة هي الحل الرئيسي اللي هتتفرع منه كل الحلول، يبقى آن الأوان للمواطنة انها تخرج من متاهات التنظير والشعارات والفشخرة بشوية حبر على ورق، وتتحول لواقع نعيشه فعلاً ونمارسه مش مجرد وهم بنوهم نفسنا ان احنا عايشينه، ولا حتى مجرد حلم نحلم بيه زي الجعان اللي بيحلم بسوق العيش وهو يا ولداه نايم على لحم بطنه وبيموت من الجوع.
يعني إيه مواطنه؟ وازاي نفك أسرها؟ وازاي ننفخ في صورتها؟ ده اللي هنتناقش فيه مع ضيوفنا النهاردة:
المستشار مقبل شاكر نائب رئيس المجلس القومي لحقوق الانسان
الدكتور محمد كمال أستاذ العلوم السياسية بجامعة القاهرة وأمين التثقيف بالحزب الوطني الديمقراطي
الدكتور منير فخري عبد النور سكرتير عام حزب الوفد