पीएमएलए न्यायालयाने नवाब मलिक यांना 14 दिवसांची न्यायालयीन कोठडी सुनावली आहे. कुख्यात गुंड दाऊद इब्राहिम याच्याशी आर्थिक व्यवहार केल्याप्रकरणी ही कोठडी सुनावली आहे. राष्ट्रवादी काँग्रेसचे मंत्री नवाब मलिक यांना विशेष न्यायालयाने दिलासा देण्यास नकार दिला आहे. आजच्या सुनावणीदरम्यान ईडीने मलिकांना न्यायालयीन कोठडीत पाठवण्यास हरकत नसल्याचे सांगितले. ईडीने मलिकांच्या चौकशीसाठी त्यांच्या कोठडीचा कालावधी वाढवून मागितला होता. विशेष न्यायालयाने ही मागणी मान्य केल्याने मलिकांना 21 मार्चपर्यंत कोठडी सुनावली आहे. नवाब मलिक यांच्या वकिलांनी जामिनासाठी उच्च न्यायालयात अर्ज दाखल केला आहे. त्यामुळे आता उच्च न्यायालयात काय घडणार, याकडे सर्वांच्या नजरा लागल्या आहेत. दुसरीकडे भाजपने अधिवेशनात मलिकांच्या मंत्रिपदाच्या राजीनाम्याची मागणी लावून धरली आहे.