भोर येथून शिवज्योत आणण्यासाठी रायगडच्या दिशेने निघालेल्या तीन शिवप्रेमींची मोटारसायकल 200 फुट दरीत कोसळली. ही घटना शनिवारी सकाळी 3.30 वाजताच्या सुमारास घडली आहे. वरंध घाटात कावळे किल्ल्याजवळ हा भीषण अपघात झाला. या अपघातामध्ये तीघे तरुण एकाच मोटारसायकलवर होते. गाडीवर संयम सुटल्याने हा अपघात घडला आहे. दोघांना महाडच्या ग्रामीण रूग्णालयात दाखल करण्यात आले आहे. तर एकाला प्रथमोपचार करून घरी पाठविण्यात आले आहे. केतन देसाई, प्रथमेश गरुड, किरण सुर्यवंशी अशा तीन तरूणांची नावे आहेत. महाड औद्योगिक वसाहत पोलिस आणि स्थानिकांच्या मदतीने जखमींचे प्राण वाचवले. आज महाराष्ट्रात सगळीकडे शिवजयंती अगदी मोठ्या उत्साहात सुरू आहे. पण अशा घटना घडत असल्यामुळे दु:ख देखील व्यक्त करण्यात येत आहे.