भाजप नेते आशिष शेलार यांनी मुंबईच्या महापौर किशोरी पेडणेकर यांच्यासंदर्भात केलेल्या वादग्रस्त वक्तव्यामुळे निर्माण झालेला वाद आणखी तापण्याची चिन्हे आहेत. राज्य महिला आयोगाच्या अध्यक्ष रुपाली चाकणकर यांनी शेलार यांनी केलेल्या आक्षेपार्ह वक्तव्याची दखल घेत मुंबई पोलिसांकडून अहवाल मागवला होता. त्यानंतर आता महापौर किशोरी पेडणेकर यांनी थेट गृहमंत्री दिलीप वळसे-पाटील यांना पत्र पाठवून आशिष शेलार यांच्या वक्तव्याविषयी नाराजी व्यक्त केली आहे. आशिष शेलार यांनी महिलांविषयी असंवैधानिक भाषेचा वापर केला होता. यासाठी ते माफी मागतील, अशी आशा होती. मात्र, त्यांनी माफी न मागितल्यामुळे मी गृहमंत्र्यांना पत्र लिहले आहे. आता राज्य महिला आयोग आणि गृहमंत्री त्यावर कायदेशीर कारवाई करतील, अशी आशा किशोरी पेडणेकर यांनी व्यक्त केली. तत्पूर्वी शिवसेनेच्या महिला आघाडीने मुंबईचे पोलीस सहआयुक्त विश्वास नांगरे-पाटील यांच्याकडे तक्रार दाखल केली होती. त्यामुळे आशिष शेलार यांच्या अडचणीत वाढ झाल्याचे बोलले जात आहे.