पुणे जिल्ह्यातील गावात सरपंचपदाच्या निवडणुकीनंतर मिरवणुकीत पाडला नोटांचा पाऊस
दावडी : सरपंचपदाची निवडणुक म्हणलं की नेते व कार्यकर्त्यांच्या उत्साहाला उधाण येते. विजयी उमेदवार आनंद साजरा करण्यासाठी पेढे वाटतात किंवा विजयी उमेदवारांची गावात-वाजत गाजत मिरवणुक काढली जाते. मात्र याही पुढे जाऊन दावडी (ता. खेड) येथील विजयी उमेदवार व समर्थकांनी सरपंच व उपसरपंच यांना निवडणुकीनंतर हार घालण्यासाठी क्रेनचा वापर केला तर फोटोसेशन जेसीबीवर केले. कहर म्हणजे एका कार्यकर्त्याने चक्क नोटांची उधळण करत आनंद व्यक्त केला.

दावडी येथे बुधवार (ता. २४ रोजी) सरपंच व उपसरपंचपदासाठी निवडणुक झाली. या निवडणुकीमध्ये सरपंचपदी संभाजी घारे व उपसरपंचपदी राहूल कदम बिनविरोध निवडले गेले. निवडणुक झाल्यावर उत्साही कार्यकर्त्यांनी मोठा हार आणून क्रेनच्या सहाय्याने तो हार सरपंच व उपसरपंचांना घालण्यात आला. एका कार्यकर्त्याने नोटांचे बंडल काढून पैशांची उधळण केली.