Remembering East Pakistan
nazm
sardaari
سَرداری
مُستَنَد دانا و بِینا ، تُند شُعرا ئے کِرام
ہَم سے نادانی میں کَرتے ہیں حِقارَت سے کَلام
اَمن کی خواہِش میں یُونہی ہَم تو رُسوا ہو گَئے
کَون کَہتا ہے شِکَستِ دائِمی تھی اَپنے نام ؟
خِرقہ ءِ خاکِستَری نہ ہاتھ میں تِیر و تَبَر !
قابِلِ آزادگی کَب ہیں یہ جَمہُورِ اَنام؟
چھِین لیتا ہے خُدائی فَوجداروں سے عِناں !
کِس کو ہے مَنظور یہ آئِین و جَمہُوری نِظام ؟
اِنتِخابی ڈھونگ سے جاتا نِشانِ رِق نَہِیں !
بے سَبَب باغی ہُوئے تھے ہَم سے بَنگالی عَوام
ہَم نے بھی لاکھوں کا بِن دیکھے کِیا قِصّہ تَمام
فَقر کے مارے ہُوئے تھے یُوں بھی صَدیوں کے غُلام!
حُسن تھا بَنگال کا اَپنے لِیے مِلکِ یَمِیں
ہَم کو قُدرَت نے دِیا تھا پاسبانی کا اِنعام!
جان کے دَر پے ہَماری تھے سَبھی اَہلِ وَطَن
قَوم ہَم سے چاہتی تھی قَتل و خُوں کا اِنتِقام!
جَب ہُوئی عَنقا وَطَن میں ایک بھی جائے اَماں
دُشمَنوں کو ہَم نے بھیجا پِھر مُحَبَّت کا پَیام
لاکھ صَدقے ہَم عَدُو کے ظَرفِ عالِیشان پَر
شَرف اُن کو چاہِیے تھا میزبانی کا تَمام
دعوَتِ سالارِ دُشمَن تھی بَشَرطِ عاجزی
اَپنے مَسلَک میں بُلاوے کو ہے ٹُھکرانا حَرام!
رَکھ دِیے قَدموں میں اُن کے زیرِ اِحسان و نیاز
اَپنی دَستارِ بَسالَت ، اَپنی شَمشِٰیر و نِیام!
شَرف اَفزا تھِیں ہَمارے واسطے پا بوسیاں
جُھک کے قَدموں میں کِیے ہَم نے اُنہیں صَد ہا سَلام!
ہَم کو دُشمَن کی پَناہوں میں قَرارِ جاں مِلا
کُوچ کَرنے کا وَطَن سے ہَم نے پایا اِذنِ عام
لُٹ گَئی عِصمَت تو کیا ؟ اِیمان تو باقی رَہا !
خُوب تھی اَپنی اِسارَت ، خُوب تھا اَپنا قِیام !
ہَم کو مَشرِق کے حَیا داروں نے ٹُھکرایا تو کیا؟
غَرب میں تو آج بھی ہَم ہی ہیں سَردار و اِمام !
sikander aqeel ansari