Në Durrës viti i ri shkollor ka nisur më një sfidë të dyfishtë! Përveç pandemisë, Durrësi është një nga zonat më të prekura nga tërmeti i 26 nëntorit, e për pasojë mësimi do të zhvillohet në disa turne.

Konkretisht 5 shkolla do të mësojnë me 1 turn sepse i plotësojnë të gjitha standartet. Në to mësojnë 1644 nxënës. 6 shkolla do të zhvillojnë mësim me 2 turne, por mund t'i zhvillojnë orët e plota sepse përdoren nga 1 shkollë. Në to mësojnë 1918 nxënës.

33 shkolla do të zhvillojnë mësim me 2 turne sepse do të përdoren nga 2 shkolla, ku marrin mësim 16.828 nxënës. 2 shkolla do të përdoren me 3 turn për shkak se kanë 1029 nxënës. Në 8 shkolla mësimi do të zhvillohet me 4 turne, ku mësojnë 3735 nxënës.

24 624 nxënës do të ulen këtë të hënë në bankat e shkolla, 1777 prej tyre për herë të parë. 33 shkolla kanë hapur dyert për të mirëpritur nxënësit, teksa 32 shkolla të tjera janë në proces ndërtimi.