dukh apnā agar ham ko batānā nahīñ aatā
tum ko bhī to andāza lagānā nahīñ aatā

pahuñchā hai buzurgoñ ke bayānoñ se jo ham tak
kyā baat huī kyuuñ vo zamāna nahīñ aatā

maiñ bhī use khone kā hunar siikh na paayā
us ko bhī mujhe chhoḌ ke jaanā nahīñ aatā

is chhoTe zamāne ke baḌe kaise banoge
logoñ ko jab aapas meñ laḌānā nahīñ aatā

DhūñDhe hai to palkoñ pe chamakne ke bahāne
aañsū ko mirī aañkh meñ aanā nahīñ aatā

tārīḳh kī āñkhoñ meñ dhuāñ ho ga.e ḳhud hī
tum ko to koī ghar bhī jalānā nahīñ aatā


Facebook:
https://web.facebook.com/ZeeandPoetry

Twitter:
https://twitter.com/ZeeandPoetry

Instagram:
https://www.instagram.com/zeeandpoetry/

#Zee&Poetry