TIRANË - Në natën e ndërrimit të viteve kemi qëndruar në sallën operative dhe të komandimit në Drejtorinë e Policisë Tiranë. Është pikërisht kjo sallë aty ky vijnë telefonatat në numrin e emergjencës "112" ndërsa njoftimet i shpërndahen më pas patrullave të komisariateve në terren.
Në këtë episod të emisionit "112" të realizuar nga gazetari Antonio Çakshiri ju tregojmë si u përjetua ndërrimi i viteve në këtë sallë nga ku komandohet gjithë puna e efektivëve të Policisë së Shtetit në kryeqytet ndërsa punonjësit menaxhojnë situatat e ndodhura në orët e para të mëngjesit të 1 janarit 2020.
13 ndihmës specialistë të Policisë së Shtetit së bashku me një shef seksioni në këtë sallë dhe 4 operator të "112" kaluan mbrëmjen e ndërrimit të viteve në detyrë për të ndihmuar qytetarët dhe për të menaxhuar shërbimet e policisë në terren.
Mbrëmja përpara ndërrimit të viteve kaloi e qetë përveç një rasti të një aksidenti me një të lënduar, ndërsa orët e para të mëngjesit të vitit të ri kanë qenë më intensive për punonjësit e sallës operative.
Dy raportime për zjarre në banesa marrin vëmendje maksimale nga punonjësit e sallës ndërsa ne shohin situatën e transmetuar live nga kamera e trupit të efektivit të policisë në sallën e komandimit.

Gazetar: Antonio Çakshiri
Lexoi tekstin: Besard Jacaj