Dy ditë pas pezullimit të punimeve të hidrocentralit të ?Strori?, i cili po ndërtohet nga kompania ?Era Hydro?  në hyrje të kanionit të Holtës në Gramsh, qeveria ka nisur dëgjesa me komunitetin, i cili po proteston prej ditësh për anulimin e kontratës koncesionare.

Banori: Do e anuloni apo jo?

Belinda Balluku:  Unë i kam pezulluar punimet.

Ministrja e Infrastrukturës dhe Energjisë u premtoi banorëve se interesi i tyre do të jetë mbi atë të kompanive private.

Por përfaqësuesi i firmës që po bën punimet e hidrocentralit, tha se ndërtimi i tij është bërë duke zbatuar të gjitha rregullat e kontratës dhe ligjet shqiptare.

Blendi Klosi, ministri i Turizmit dhe Mjedisit, tha se edhe pse ndërtimi i HEC-it "Strori" është jashtë zonës së mbrojtur, ai sërish pengon hyrjen në kanion dhe dëmton rrjedhën e lumit. Ai premtoi shqyrtim edhe për rastet e tjera të ngjashme.

Në Prill të 2018-s qeveria shqiptare miratoi lejen për ndërtimin e një hidrocentrali në hyrje të Kanionit të Holtës që shtrihet mbi lumin Devoll.

Pas protestave të banorëve minitrja e re e Infrastrukturës dhe Energjisë pezulloi punimet për 344 hidrocentrale dhe premtoi anullim të kontratave të tyre në bazë të gjetjeve që do dalin pas skanimit të mënyrës së zbatimit të rregullave.