Subscribe në Ora News këtu http://bit.ly/1s5j7UT

Qeveria ka përgatitur ligjin për amnistinë e fundit të vitit 2018 dhe ia ka nisur për dhënie mendimi Ministrisë së Brendshme dhe Prokurorisë së Përgjithshme për të dalë në një version përfundimtar dhe të pranueshëm për personat që do të përfitojnë. Por ky projektligj rrezikon të mbetet thjesht në letër.

Kjo pasi maxhoranca në parlament nuk i ka votat për ta miratuar. Sipas Kushtetutës në nenin 81 të saj në pikën 'ë', thuhet se ligjet për amnistinë miratohen me tre të pestat e anëtarëve të të gjithë anëtarëve të Kuvendit, pra 84 vota, që Partia Socialiste me aleatët nuk i ka.

Për të votuar ligjin e amnistisë, do të duhet që socialistët të arrijnë konsensusin me opzitën ose t?i rrëmbejnë asaj 5 deputetë. Konsensusi me opozitën nuk duket i lehtë sepse prej 4 muajsh tashmë, deputetët e Partisë Demokratike dhe të Lëvizjes Socialiste për Integrim kanë bojkotuar parlamentin dhe kanë vënë si kusht vetingun e politikanëve për rikthimin e tyre.

Në këto kushte shpresa mbetet tek Komisioni i Venecias, i cili më datën 14 dhjetor miraton opinionin për projektligjin e propozuar nga Partia Demokratike për vetingun në politikë. Kjo do të thotë se palët politike do të kenë një dokument mbi të cilin do të punojnë dhe kjo mund të jetë një arsye për kthimin e opozitës në Kuvend.

Një tjetër ligj i rëndësishëm, i cili do të duhet të kalojë është ligji zgjedhor, për të cilin palët kanë bërë përparime dhe vijojnë negociatat për të përmbyllur dhe pikat e fundit. Ky ligj mund të kalojë në parlament në fund të dhjetorit dhe sërish kërkon 84 vota.

Për më shumë lexoni në: http://oranews.tv/article/amnistia-rrezikon-te-deshtoje-duhen-84-vota-ne-parlament-maxhoranca-nuk-i-ka