81 të vdekur, 187 të plagosur, rreth 100 të zhdukur dhe mijëra banesa të shkrumbuara, është bilanci i zjarrit masiv që ra ditën e hënë në periferi të Athinës. Zjarrfikëset, mjetet e ushtrisë, por edhe automjetet të tjera të ndihmuar edhe nga helikopterët vijojnë luftën me flakët në Kineta dhe disa zona të tjera, duke bërë që situata të vihet nën kontroll. Mes viktimave zyrtarisht është edhe një shqiptare, Nica Leka, rreth 85 vjeç me origjinë nga Leshnica e Sarandës, e cila mësohet se ka vdekur në banesën e saj, në vendin e quajtur Mati. Bashkëshorti i saj grek ndodhet në gjendje kritike për jetën. Por dyshohet se shqiptarët që humbën jetën nga zjarri janë tre, pasi përpos 85-vjeçares nga Saranda, janë shpallur të zhdukura dy shqiptare të tjera, punonjëse të një taverne, ndërsa të plagosur janë mbi 13.


Mes historive që kanë përfunduar tragjikisht, ka pasur edhe të mbijetuar, siç është edhe rasti i Panajotis Dagalos. Ai rrëfen momentin e flakëve, duke shprehur dhimbjen për fatin e bashkëshortes së tij, së cilës nuk ia di vendndodhjen.