సిల్వర్ స్క్రీన్‌పై నీతులు మాట్లాడే హీరోలు నిజ జీవితంలో కూడా చాలా జాగ్రత్తగా ఉండాల్సిందే. నిబంధనలు ఉల్లంఘిస్తే రీల్ లైఫ్‌లో ఉండే క్రేజ్ మొత్తం తుస్సుమనడం ఖాయం. ట్రాఫిక్ రూల్స్‌ను ఉల్లంఘించిన తమిళ హీరో జై ప్రస్తుతం ఓ వివాదంలో ఇరుక్కొన్నారు. గతంలో శిక్షపడినా మళ్లీ అలాంటి తప్పే చేసి పోలీసులకు జై పట్టుబడటం సినీ వర్గాల్లో చర్చనీయాంశమైంది.
గతేడాది సెప్టెంబర్‌లో ఫుల్లుగా మద్యం సేవించిన తర్వాత కారు నడుపుతూ చెన్నైలోని శాస్త్రి నగర్ ట్రాఫిక్ పోలీసులకు పట్టుబడ్డారు. ఆ కేసులో అతడికి జరిమానా విధించడమే కాకుండా ఆరు నెలలపాటు తన లైసెన్స్‌ను కోర్టు సస్సెండ్ చేసింది. ఇకనైనా మారుతాడనుకొంటే మరోసారి ట్రాఫిక్ పోలీసులకు చిక్కాడు.
తాజాగా చెన్నైలోని అడయార్ ప్రాంతంలో తన విలాసవంతమైన కారులో ప్రయాణిస్తూ నిబంధనలకు విరుద్ధంగా పెద్దగా శబ్దం చేస్తూ వెళ్లడం కెమెరాల్లో రికార్డైంది. కారకు హై డిసిబుల్ సైలెన్సర్‌ను ఉపయోగించడం వల్ల చెవులు తూట్లు పడేలా శబ్దం వినిపించింది. ఈ న్యూసెన్స్ కారణమైన జై పోలీసులు విచారించారు.
ట్రాఫిక్ పోలీసుల విచారణ సందర్భంగా తన తప్పును ఒప్పుకొని జై క్షమాపణలు కోరినట్టు సమాచారం. అలాగే తన కారుకు బిగించిన పరికరాన్ని కూడా తొలగిస్తానని మాట ఇచ్చాడట. ఇక ముందు ట్రాఫిక్ నిబంధనలు ఉల్లంఘించనని అధికారులకు రాతపూర్వకమైన పత్రాన్ని సమర్పించినట్టు తెలిసింది.