Gjyqtari i Gjykatës së Lartë, Edmond Islamaj, është gjyqtar i parë mashkull që pritet të kalojë me sukses procesin e Vettingut. KPK lexoi sot raportin për Islamajn, prej ku rezultoi se ai ka pasuri me burim të justifikuar dhe nuk ka kryer deklarim të rremë.

Nga hetimet e KPK, rezulton që gjyqtari të ketë dy apartamente në Durrës, ku njëri është në pronësi të bashkëjetueses, 1000 m2 tokë arë në Kavajë, dy garsionere dhe garazh+dyqan te Shkëmbi i Kavajës, si dhe një autoveturë.

Vetë gjyqtari Islamaj ishte i pranishëm në seancën dëgjimore, ku deklaroi se pasuria e tij dhe e familjes së tij është e trashëguar nga gjyshërit.
Pas gjyqtarit të Gjykatës së Lartë, Edmond Islamaj, edhe prokurori Dritan Prençi, i cili është një prej prokurorëve që po heton dosjen e ish-ministrit të Brendshëm, Saimir Tahiri, pritet të kalojë me sukses Vettingun, pasi nga hetimi i KPK ka rezultuar me një pasuri modeste.

Prokurori në Prokurorinë pranë Gjykatës së Shkallës së Parë për Krimet e Rënda Tiranë pritet të konfirmohet në detyrë, pasi Komisioni i Pavarur i Kualifikimit ka vlerësuar se ai ka pasuri të ligjshme dhe nuk ka kryer deklarim të rremë. Nga hetimi i KPK, ka rezultuar se prokurori Prençi ka një apartament banimi 74 m2 në Kashar, të marrë me kredi, si dhe një makinë 'Golf' të blerë vetëm 50 mijë lekë.