Kryetarja e Komisionit të Sigurisë, njëherësh deputet e PS, Ermonela Felaj, ka komentuar në studion e Report Tv akuzat e PD ndaj vëllait të ministrit të Brendshëm, Fatmir Xhafaj, dhe qëndrimin e këtij të fundit. Felaj deklaroi se akuzat e PD nuk lidhen me ministrin Xhafaj si individ, por kanë për qëllim rrëzimin e qeverisë, teksa vendi ndodhet në prag të hapjes së negociatave.

Sipas ligjvënëses socialiste, opozita po shfrytëzon skepticizmin e disa vendeve evropiane me të dhëna të sajuara për të sulmuar mazhorancën, e cila sipas saj, ka marrë një rekomandim pa kushtëzim për integrimin e Shqipërisë, si dhe ka shënuar rezultate mjaft të rëndësishme në luftën kundër krimit dhe korrupsionit.

Ndër të tjera, deputetja zbuloi dhe skenarin e opozitës nesër në seancë plenare, duke paralajmëruar të njëjtën situatë si në seancën kur u zgjodh Kryeprokurorja e Përkohshme, Arta Marku, ku opozita hodhi tymues e flakadanë në sallë, si dhe zhvilloi protestë jashtë dyerve të Kuvendit.