Subscribe në Ora News këtu http://bit.ly/1s5j7UT

Vijon të mbetet problematike situata e zjarreve në vend. 10 vatra janë regjistruar në 24 orët e fundit sipas Emergjencave Civile. Më shqetësuese situata paraqitet në qarkun e Lezhës dhe të Dibrës.
Me dhjetra hektare pyje e pemë frutore vijojnë të digjen në mbarë vendin. Emergjencat Civile bëjnë më dije se përgjatë 24 orëve të fundit janë regjistruar 10 vatra zjarri, ndërsa më problermatike situata duket të jetë në qarkun e Lezhës dhe të Dibrës.
Forcat zjarrfikëse kanë hasur vështirësi në aksionin për shuarjen e vatrave të zjarrit në Malin e Rënecit për shkak të terrenit të thyer malor. Pas disa orë punë është bërë e mundur që zjarri të shuhet. Si pasojë u dogj rreth 6 ha me ferra dhe dushqe. Ndërkohë zjarr ka rënë edhe në fshatin Berzanë si dhe në fshatin Lajthizë. Vatra e zjarrit në fshatin Skuraj të Kurbinit vijon të jetë ende aktive. Forcat dhe mjetet e zjarrfikësve nuk kanë mundur të ndërhyjnë për shkak të terrenit të vështirë.
Në qarkun e Dibrës zjarri në Malin e Theknit në Martanesh u riaktivizua ditën e enjte. Si pasojë është djegur një sipërfaqe prej rreth 5 ha me shkurre dhe pisha. Forcat operacionale po punojnë edhe ditën e sotme për të izoluar vatrat e zjarrit.
Ndërkohë në fshatin Mazhicë për të shuar flakët e zjarrit kanë punuar forca vullnetare të fshatit, të cilat kanë mundur të izolojnë vetëm zjarrin nga krahu i banesave. Vatrat e tjera vijojnë të jenë aktive por nuk paraqesin rrezik për zonën e banuar.

Për më shumë lexoni në: http://www.oranews.tv/vendi/dhjete-vatra-zjarri-me-problematike-situata-ne-lezhe-dhe-diber/