Partia Socialiste feston të hënën, në 12 qershor, ditëlindjen e saj të 26, dhe pavarësisht se kjo ditëlindje e gjen në kulmin e fushatës për zgjedhjet e 25 qershorit, Edi Rama ka menduar të organizojë një festë pritjeje.

Aktiviteti do të zhvillohet pranë selisë qendrore të Partisë Socialiste në orën 19:30 dhe është konceptuar si një takim i të gjithëve pas një kohe të gjatë shpërndarjeje në terren.

Burime të Shqiptarja.com pranë organizatorëve të PS, bëjnë me dije se ftesë ju është dërguar të gjithë aleatëve të PS-së, me të cilët Rama nënshkroi marrëveshjen e koalicionit në vitin 2013.

Këtu përfshihet dhe Ilir Meta, Shpëtim Idrizi dhe Paskal Milo, pavarësisht se së fundmi, tonet mes tyre janë ashpërsuar dhe marrëdhënia nuk duhet aspak e mirë që ndonjëri prej tyre t?i përgjigjet pozitivisht ftesën. Janë ftuar po ashtu figurat historike të PS-së ndër vite, deputetë e ish-deputetë, sikundërse edhe kandidatët e kësaj sfide elektorale.