Bigri Na Kabhi Un Se bani soch raha hoon
kiyon aag mere dil mein lagi soch raha hoon

woh aik jhalak barson se jis ki nahin dekhi
nazron se woh soorat na miti soch raha hoon

jab yaadon ne aa ghera achanak mujhe un ki
kis shan se woh sham saji soch raha hoon

us zulf-e-moattar ki hi khushbu hai faza mein
har samt yeh hai kaisay basi soch raha hoon

moondi thi zara aankh to mehsoos hua yoon
pehlu mein koi barq giri soch raha hoon

jazbaat ka izhar bhi karnay se tha qasir
hai mujh se bara kon dukhi soch raha hoon

tareef meri kartay hein milnay se guraizan
kya mujh mein Bukhari hai kami soch raha hoon

Poet: Altaf Bukhari
Voice: Imran Sherazi