jab tera hukam mila , tark e mohabbat kar di
dil magar is pe woh dharka ke qayamt kar di

tujh se kis tarah mein izhar e mohabbat karta
lafz soojhay to maani ne baghawat kar di

mein to samjha tha ke laut aatay hein janay walay
tu ne ja kar judai meri qismat kar di

tujh ko pooja hai ke asnaam parasti ki hai
mein ne wahdat ke mafahim ki kasrat kar di

mujh ko dushman ke iradon pe bhi pyar aata hai
teri ulfat ne mohabbat meri aadat kar di

pooch betha hoon mein tujh se tere koochay ka pata
tere halaat ne kaisi teri soorat kar di

kya tera jisam tere husan ki hidat mein jala ?
raakh kis ne teri sonay ki si rangat kar di

Poet: Ahmad Nadeem Qasmi
Voice: Imran Sherazi