ТВ АЛФА 31.07.2016 17:33:26 Она што загрижува, според нив е фактот што децата на интернет полесно ги учат странските јазици наместо мајчиниот, што им создава проблеми кога ќе тргнат на училиште.

Играње ластик, народна или фрлање на џамлии - оваа слика ретко може да се види во парковите и во маалата во последниве десетина години. Наместо да се социјализираат со своите врсници, децата слободното време го минуваат со мобилниот телефон во рака. Компјутерите и мобилните можат да бидат корисна алатка за учење нови содржини, но исто така можат да бидат опасни за развојот на децата, велат експертите. Благодетите на модерната технологија кои ги уживаат децата во денешно време се големи, велат од Првата детска амбасада во светот Меѓаши, но големи се и опасностите кои се кријат на социјалните мрежи. Виртуелните игри кои најчесто се полни со насилство, можат да предизвикаат исто такво однесување кај децата и во секојдневниот живот.

Уште од најмала возраст детето треба да си игра, а секое одвојување од неговите врсници води кон оттуѓување, неможност за комуникација, говорот му доцни и психофизичкиот развој е сведен на минимум, велат специјалистите. Она што загрижува, според нив е фактот што децата на интернет полесно ги учат странските јазици наместо мајчиниот, што им создава проблеми кога ќе тргнат на училиште.

Брзиот начин на живот е причина поради која родителите своето отсуство од дома го надоместат купувајќи им на децата мобилни телефони и таблети за да се занимаваат, велат познавачите додавајќи дека најдобро за развојот на децата е слободното време да го минуваат со своите родители и со другарчињата и преку заедничка интеракција да ги научат сите животни предизвици.