Shirat e rënë gjatë 24 orëve të fundit kanë shkaktuar përmbytje të shumta në fshatin Mazhë e madhe në rrethin e Krujës. Janë dhjetra hektarë që ndodhen nën ujë në këtë fshat si edhe ne vendin e quajtur Ura e Gjolës.

Siç thonë banorët, këto toka vazhdojnë të jenë të përmbytura deri në muajin maj, pasi ato realisht nuk thahen kurrë, por ndryshon vetëm niveli i ujit në varësi të shirave që bien.

Arsyeja e këtyre përmbytjeve janë mospastrimi i kanaleve që prej 25 vjetësh dhe megjithëse ky problem i madh e i përhershëm njihet, askush nuk ka marrë masa për stabilizimin e gjendjes.

Banorët thonë se para disa ditësh filloi pastrimi i një kanali që kullon ujrat e larta që vijnë nga kodrat, por kjo punë bëhet sa për të kaluar radhën, pasi larja e kanalit është bërë vetëm disa centimetra thellësi.