Ölkəmizdə fiziki və hüquqi şəxslərə məxsus bütün mülkiyyət formalarında olan obyektlər və mənzillər Daxili İşlər Nazirliyi Baş Mühafizə İdarəsinin (BMİ) əməkdaşları tərəfindən etibarlı şəkildə qorunur.

DIN-dən APA TV-yə verilən xəbərə görə, fevralın 6-da gecə saatlarında Binəqədi Rayon Mühafizə İdarəsi (RMİ) tərəfindən qorunan rayon ərazisindəki “Ucuz” marketdən Mərkəzi Mühafizə Məntəqəsinə daxil olan “həyəcan” siqnalı yoxlanılan zaman obyektin giriş qapısına oğurluq məqsədilə müdaxilə olunduğu aşkar edilib. Hadisəni törətməkdə şübhəli bilinən şəxs qaçmaq istəyərkən RMİ əməkdaşları tərəfindən saxlanılaraq aidiyyəti üzrə 4-cü Polis Bölməsinə təhvil verilib.

Araşdırma zamanı həmin şəxsin Yasamal rayon sakini, əvvəllər məhkum olunmuş Kərim Məmmədov olduğu müəyyən edilib. Onun üzərinə baxış zamanı mağazanın qapısını sındırmaq üçün istifadə etdiyi dəmir ling və bıçaq aşkar olunaraq götürülüb. Müşahidə qurğularına baxış keçirilərkən K.Məmmədovun həmin gün Nəsimi RMİ tərəfindən mühafizə olunan “Butastore” supermarketindən də oğurluğa cəhd etdiyi müəyyənləşdirilib.

Binəqədi RMİ əməkdaşlarının keçirdiyi növbəti uğurlu tədbir nəticəsində vətəndaşın xüsusi vasitələrlə qorunan mənzilindən oğurluq edilməsinin də qarşısı vaxtında alınıb. 6-cı mikrorayon ərazisində yerləşən mənzillərin birindən Mərkəzi Mühafizə Məntəqəsinə daxil olan “həyəcan” siqnalı yoxlanılan zaman oğurluq məqsədilə həmin evə daxil olmuş Sumqayıt şəhər sakini Əfsanə Muxtarova saxlanılaraq ərazi üzrə 7-ci Polis Bölməsinə təhvil verilib.

Gecə saatlarında BMİ-nin Mərkəzi Mühafizə Məntəqəsinə Abşeron rayonunun Göradil qəsəbəsində vətəndaşa məxsus bağ evindən daxil olan “həyəcan” siqnalı əsasında idarənin tutucu qrupunun əməkdaşları hadisə yerinə yollanıb. Baxış zamanı pəncərənin dəmir barmaqlıqların sındırıldığı və açıq olduğu aşkar edilib. Polis əməkdaşlarının çevikliyi sayəsində qarət məqsədilə mənzilə daxil olan iki nəfər zərərsizləşdirilərək ərazi üzrə müvafiq polis bölməsinə təhvil verilib. Araşdırmalar zamanı həmin şəxslərin Qubad İbadov və əvvəllər məhkum olunmuş Mirhəşim Seyidov olduğu məlum olub. M.Seyidovun üzərindən uzunluğu 35-50 sm olan bıçaq və narkotik maddə aşkar edilərək götürülüb.

Hər 3 faktla bağlı başlanan araşdırmalar və müvafiq əməliyyat-axtarış tədbirləri davam etdirilir.

Onu da qeyd edək ki, 2016-cı ilin yanvar ayından indiyədək BMİ-nin idarə, şöbə və bölmələri tərəfindən Bakı, Sumqayıt şəhərləri və Abşeron rayonunda 10-dan artıq oğurluq hadisəsinin qarşısı vaxtında alınıb. Hazırda DİN-in Mühafizə Xidməti tərəfindən dövlət və özəl mülkiyyətə məxsus 10 mindən çox obyekt qorunur.