LUSHNJE - Një skandal pedofilie është zbuluar në fshatin Kryekuq të Lushnjës. Një e mitur 9-vjeçare prej tre muajsh ngacmohej seksualisht nga një 66-vjeçar i cili tashmë është arrestuar nga policia.

A1 Report mëson se Selman Carciu, kryente veprime të turpshme me të miturën në ambientet e dyqanit të tij në fshat. Ka qenë nëna e 9-vjeçares që ka zbuluar gjithçka.

Ajo ka ndjekur vajzën e saj për tek dyqani i të moshuarit ku konstatoi se e mitura ra pre e ngacmimeve të maniakut që tashmë ndodhet prapa hekurave. Denoncimi në polici është bërë nga prindërit e të miturës, ndërsa menjëherë më pas është bërë arrestimi i të moshuarit.

Ky i fundit duke parë situatën e vështirë ekonomike të familjes së vajzës ka përfituar të shfrytëzojë këtë të fundit duke kryer veprime të turpshme. Banorët e fshatit të pyetur nga gazetari i A1 Report në Lushnjë Ermir Dervishi, shprehen të shokuar për këtë ngjarje dhe mbi të gjitha për të arrestuarin të cilin e njohin si njeri korrekt.

Një rast i ngjashëm është shënuar edhe pak kohë më parë në këtë fshat, e duke marrë shkas nga kjo banorët kërkojnë që shkolla e fshatit të ketë psikolog.