LEZHE- Një 33-vjeçar humbi jetën pasi automjeti me të cilin ai udhëtonte humbi kontrollin dhe u përplas me murin rrethues të një lokali. Aksidenti tragjik ndodhi rreth orës 9:00 të mëngjesit të sotëm në afërsi të portit në Shëngjin, ndërsa viktimë ka mbetur Fred Kaçorri.

Policia bëri të ditur se ai ka qenë duke lëvizur me automjetin e tij tip "FIAT" ku nga shpejtësia e madhe ka humbur kontrollin dhe është përplasur me muret rrethues të lokalit.

Përplasja ka qenë e fortë, duke i shkaktuar vdekjen e menjëhershme 33-vjeçarit ndërsa motori i mjetit është shkëputur dhe është gjetur 50 metra larg vendit ku ndodhi aksidenti.

Trupi i pajetë i Kaçorrit ka qëndruar për rreth 1 orë në automjet për shkak të dëmtimeve që kishte marrë makina .Është dashur ndërhyrja e zjarrfikësve për të prerë disa pjesë të mjetit për të bërë të mundur nxjerrjen e trupit të viktimës.

Ai është marrë nga një autoambulancë dhe është dërguar në morgun e spitalit të Lezhës, ku do t'i nënshtrohet mjekësisë ligjore.

Policia e Lezhës bëri të ditur se nga hetimet e para ka rezultuar se shkak për aksidentin është bërë lëvizja tej normave të lejuara e 33-vjeçarit, duke shkaktuar humbjen e kontrollit të mjetit nga ana e tij.

Fred Kaçorri ishte kthyer vetëm një vit më parë nga emigracioni në Itali dhe kishte hapur një biznes të vogël në Shëngjin. Ai ishte i martuar dhe babai i dy fëmijëve të mitur.