Durrës-Një skelet njeriu është gjetur në portin e ri të peshkimit në Durrës. Dallgët e detit kanë bërë të mundur nxjerrjen e tij në breg, pranë kalatës së peshkimit. Skeleti është parë nga banorët e zones, të cilët kanë njoftuar policinë. Policia po kalon në dorë listën e personave të deklaruar të mbytur, por që trupat e të cilëve ende nuk janë gjetur. Dy pista të mundshme janë në fokusin e punonjësve të policies, mbytja në det ose ndonjë vrasje e vjetër ku pas ekzekutimit trupi mund të jetë hedhur në ujë për të zhdukur gjurmët.

Edhe pse informacionet janë të pakta, pista e parë ka më shumë gjasa të rezultojë e saktë. Muajt e fundit janë regjistruar një sërë rastesh të personave të mbytur apo që janë heddur nga trageti, trupat e të cilëve më pas nuk kanë mundur të gjenden më.

Rasti më i fundit është ai Gentian Pepës, i cili u hodh nga trageti disa ditë më parë pasi u dëbua nga Gjermania, por për shkak të dekompozimit të madh të trupit, dyshimet nuk bien mbi të.

Në vendin e ngjarjes, mbërritën forcat policore dhe një grup ekpertësh të cilët nisin hetimin. Pas hetimeve paraprake, skeleti u dërgua në morgun e qytetit të Durrësit ku do ti nënshtrohet ekzaminimeve të hollësishme.

Identifikimi i kufomës do të jetë i vështirë dhe mund të bëhet vetëm përmes analizës të AND-së. Për shkak të dekompozimit total, dyshohet se viktima të ketë qëndruar për një kohë të gjatë në ujë.