Ministri i Punëve të Brendshme Saimir Tahiri, është vlerësuar nga më shumë së 550 lexues të Shqiptarja.com si ministri më i angazhuar në 150 ditët e para të qeverisjes së mazhorancës Rama-Meta.

Kryeministri Edi Rama është radhitur i dyti me 546 vota, në sondazhin "Si po punojnë ministrat dhe deputetët", sondazh i cili prej orës 16.00 të 11 shkurtit dhe deri në orën 20.00 të datës 14 shkurt, kur u shënua dhe mbyllja e votimit, shënoi pjesmarrjen e rreth 6 mijë votuesve.

Deputeti socialist Erjon Brace, është vlerësuar me 567 vota si deputeti më i angazhuar në sallën e Kuvendit. Vendin e dytë e zë deputeti Taulant Balla me 220 vota, i pasuar nga kryeministri Rama, i cili në kategorinë e votave për deputetët ka marrë 195 vota.

Më pas në renditje, sipas votave të dhëna nga lexuesit renditet ish-kryeministri Sali Berisha, deputet i Partisë Demokratike me 169 vota.
Në renditje vijon më tej deputeti Alfred Peza me 166 vota, ndërsa mes deputetëve të LSI më i votuari është deputeti Përparim Spahiu me 112 vota.

Sondazhi "Si po punojnë ministrat dhe deputetët" pati si qëllim testimin e opinionin publik, si dhe mendimet e njerëzve mbi politikën, dhe mbi punën e deritanishme të bërë nga ministrat, por edhe nga deputetët e Kuvendit të Shqipërisë. Ky sondazh nuk ka një bazë shkencore, pasi nuk është kryer mbi një kampion të seleksionuar votuesish dhe mbi gjykimin dhe vlerësimin personal të lexuesve të Shqiptarja.com.